ایش حقی- اشعار ترکی محمد اشراقی
گون چیخیری بیزیم ائوه شاخمیری
اولدوز یاغیر بیزیم یئره یاغمیری
شاققیلداییب سولار آخیر بولاقدان
کوزه ایله سو تاپیریق اوزاقدان
بوغدا بیتیر کؤشنلرده، دؤیولور
بیزیم ائوده چؤرگی آز گؤرونور
ایپک توخور آنام گئجه گونوزو
آتام گؤرمور ایپک کؤینک اوزونو
بال کره نی قونشو ساتیر اؤزگییه
گیزلدیری اوغلو باخیب گؤرمییه
بیری توخور ایپک قالی الیله
گئچینیری اؤز ائوینده کیلیمله
نییه بئله پیس اؤلچولور دگرلر
ایش پاییندا چوخ گؤرولور ضررلر
ایشله وئرگی یئری آیری دوشوبدور
ایش یئرینه وارین پایی کؤچوبدور
ایشین گرک دگرلری آرتیلا
ایش گؤرنین امگینه باخیلا
بئله اولسا حقه چاتار ایشلیین
ایش باشیندا یئرین تاپار ایش بیلن
بو دوزوم له ایشلینلر دیرچه لر
دیریلیکده یوخسول بیراز دینجه لر
یوخسا ایشین گینه پایی آزالار
آلوئر اوسده گینه وارلی قازانار
