آغری چوخدور – اشعار ترکی محمد اشراقی
آغری چوخدور آلیب یئرین اوزونو
چوخ یئرلرده توتوب ائلین اؤزونو
آغیر سئللر آخماقدادیر چوخ یئره
دویوشلرسه قیرماقدادیر یوخ یئره
قان تؤکولور ظالملرین الی له
بؤیوک ایشلر دولانیری دلی له
تالاییری ائلین وارین اوغرولار
یالانیله ایتیر آیدین دوغرولار
پوزولورو بگنیلمیش قورقولار
سوروشولور یئنیلنمیش سورغولار
حلال حرام قاریشیری چوخ یئرده
حرام چؤرک یاپیلیری چوخ ائوده
ائللر ایچره آزالیری یاخجیلیق
اورک لر‌ه قالانیری آجیلیق
یامانلیغین سایی آرتیر ائللرده
آمانلیغین دادی قاچیر ائولرده
یارانیشلا یارانماییب یامانلیق
یارانیشدا دایانماییب آمانلیق
یالانچیلار یامانلیغی یارالدیر
پیسلر ایسه آمانلیغی آزالدیر
بو پیس دوروم گرکلی دیر دئییشه
یاخجیلیقلار امکلی دیر گلیشه
ائل ایشینی گؤرملی دیر دوز بیلن
گؤستریشی وئرملی دیر دوز دیین
دوزلوک ایله بیلیک وئره ال اله
دینج یاشاییش بلکه وئره ال ائله
۱۳۹۸/۲/۱۳
سؤزلوک :
*آغری: درد *آمانلیق : امنیت
* یامانلیق: بدی *دلی: دیوانه
* بگنیلمیش: پسندیده
*دایانماییب : متوقف نشده
*گلیشه: رشد کند * امکلی: مفید
* دوروم : وضعیت *وئره ال اله: همدست شوند* وئره ال ائله: عاید ملت شود
