ایران سئلی – اشعار ترکی محمد اشراقی
سئل گلیری گؤز یاشیلارین آخیدیر
ائولر ییخیر اوشاقلارین قاچیدیر
یارانیشین گوبورد اوزو گؤرونور
گؤی آغلاییر یاشی یئره تؤکولور
بیلینمه ییر برکت دیر بلا دیر
رحمت دیر یا پیسلیکلره جزا دیر
یا بولودلار آزیب گلیب بویانا
اؤزگه ال لر آزدیریب لار بوتایا
هر ندیرسه امتحان دیر اؤلکه یه
یاخجی فرصت دوز ایشلری گؤرمگه
ملت گرک ییخیلانی قالخیزا
کؤمک ائده داردا قالان یالقیزا
دولت گرک وار گوجویله ایشلییه
وارلی لارسا گرک ایشه گیریشه
بئله آغیر چتینلیگی سووماغا
بلالاری ائل اوبادان قووماغا
ائل له دولت ایش بیرلیگی گرک دیر
یارالاری توخداتماغا امک دیر
ایش بیرلیگی آغریلاری آزالدار
ائله دگن یارالاری ساغالدار
اولماسا بیر، ائل له دولت، بو ایش ده
درینلشر ائل آغریسی گئدیش ده
سئل دن سورا یئنی ایشلر گلجک
یاخشیلیقلار یئنی امک وئرجک
بیرلیک اگر ائدیلمییه ضرر دیر
ائدیلینسه بگنیلمیش دگر دیر
