بایاتیلار
عزیزیم گول دن گوزل
اوخور بولبولدن گوزل
یار منه بیر گول وریپ
اوزی او گولدن گوزل
************
جیرانیم داغدان آشدی
گوردوم گوزوم قاماشدی
یارلا اوز اوزه گلدیم
بیردن دیلیم دولاشدی
************
عزیزیم داغدا لالا
اوخشور گول اوزده خالا
دردی غمی آزالار
کیم یتیشه وصالا
************
یاندی بو جانیم منیم
توکولدو قانیم منیم
زامانا آلدی الدن
دینیم ایمانیم منیم
************
گزیپ آرخا دولاندیم
ساپ تک چارخا دولاندیم
ظالیم فلک الیندن
قورخا قورخا دولاندیم
************
یاتیبسان اویان داغلار
آل-یاشیل بویان داغلار
بورا ظولمت خانادی
نجه دیر اویان –داغلار؟
************
من عاشیقم هر آیلار
هر هفته لر هر آیلار
باشیم جلاد الینده
دیلیم سنی هارایلار
************
الینده فانار گزر
گزدیکجه یانار گزر
بیر کس کی یوخسول اولسا
دوست اوندان کنار گزر
************
یاغیش یاغدی یاز اولدی
گویده اولدوز سای اولدی
جفا چکدیم یار سودیم
منه قالان وای اولدی
************
لای لای بشیگیم لای لای
اویم اشیگیم لای لای
سن گت شیرین یوخویا
چگیم کشیگین لای لای
************
داغ باشینی سار آلدی
گولو باغدا خار آلدی
یولونو گوزله مکدن
گوزوم کوکو سارالدی
************
چکیلیپ درد حاصاری
گدیرم درده ساری
نامرد دیزیمی قیرسا
سوروننم مرده ساری
************
گزدیم داغی آرانی
سچدیم آغدان قارانی
وطن ویران اولسادا
جنت گوردوم اورانی
************
بیر قوش گلیر آغداشدان
خبر ورین قارداشدان
قارداش باجیدان دویسا
باجی دویماز قارداشدان
************
فلگین قهری منه
هچ گلمز رحمی منه
عالمه شربت وردی
ایچیرتدی زهری منه
************
داغلارا دولو دوشر
قار یاغار دولو دوشر
قبریم یول اوسته قازین
آنامین یولو دوشر
************
عاشیق گلیر سازی وار
غمزه سی وار نازی وار
هر باهارین بیر قیشی
هر قیشین بیر یازی وار
************
داغ باشین دومان آلماز
یار یاری درده سالماز
یار منه بیر درد وریپ
یوز ایل گچه ساغالماز
************
سالما بو درده منی
یار گورسون بیرده منی
نامرده محتاج اتمه
کس قوربان مرده منی
************
آی زامانا زامانا
اوخو قویدوم کامانا
ٳششک لر آرپا یییر
آت حسرت دی سامانا
************
سو گلدی داشا دیدی
کیرپیکلر قاشا دیدی
بی وفا یار یولوندا
گول عومروم باشا دیدی
************
اولدوز دونوب آی اولماز
یاز گتمسه یای اولماز
کونول سون گوزله
گوزللیکده تای اولماز
************
سو ایچرم بارداقدان
اوپوم قایماق دوداقدان
یاخین گله بیلمیرم
قادان آلیم اوزاقدان
