دوروم! – شعر ترکی محمد اشراقی
قونشولارین سسی گلیر کوچه دن
باغیریری اوغرو اگری یوجه دن
شیمیر گئییب امام حسین(ع) قره سین
تولو قوروب بیلمزلره تله سین
بیلینمه ییر کیم یاخشی دیرکیمسه پیس
قیزیل یئرین آلیب قارا پاسلی میس
پوزولوبدور ائلین ایچره اؤلچولر
شهری آلیب اکینچی لر چؤلچولر
وارلی پولون گیزله دیری وارسیزدان
غیرت لی لر توک سالیری عارسیزدان
ایشله یه نین الی بوش دور قارنی آج
قیزیشماییر تندیر اوسته سویوق ساج
صنعت اؤلوب آلوئر اولوب ایشیمیز
کیشی کیمی گئیینیری دیشیمیز
پول آلمامیش ایش گؤرمه ییر قوللوقچو
یول کسیری گؤز اؤنونده هوللوکچو
قوروقچولار اوغورلاییر تاخیلی
ناخیرچی لار ساتیر بوتون ناخیری
پتکچی لر بال دان اؤترو اؤلورلر
بال لارینی لوطو پوتو بؤلورلر
اکین بیچین قازانماییر دئییرلر
اکینچی لر کؤچوب شهره گئدیرلر
شهرلری دولدوروبدور یوخسول لار
یئری واردیر شهرلی لر قورخسونلار
اوغرو اگری چوخالیبدیر شهرده
ساواش دؤیوش آرتیق اولوب قهرده
آلوئر اولوب قارانلیغا داش آتماق
آلوئرچی نین ایشی اولوب یاهالتماق
دوستاق لاری دولدوروبدور اگری لر
سورسان بوتون خان لا آغا بیگ دیلر
یئرین ساتیب کندی آتیب بیر یوللوق
ایشی یوخ دور چکیر دئمک چوخ کورلوق
بؤیویورلر گونو گوندن شهرلر
بوشالیری آردیسیجا کندلر
گینه یازیم ایسته ییرسن یولداشیم؟
آغری چوخدور دئمگه بیل قارداشیم!
یازیرام کی پاسلانمایا دیلیمیز
گئچه جگی آیدین گؤره ائلیمیز
تورکجه میزه آیری سؤزلر قاتمارام
ائل قایغی سین بیله بیله آتمارام
ائلین اوغلو ائل قایغی سین چکمه لی
گله جگین آغاجینی اکمه لی
من “گونشم” چاغ گئجه نین یاریسی
ساخلا ائلیم ، آی ائلیمین تاریسی
