بیلیک سیز- محمد اشراقی
غصه بیزی بورویوبدور بوغورو
سیخینتی لار سوموگوموز اووورو
بیلمم نئجه اولدوق بئله قاراگون
گؤنوموز دن مین بیر گئجه دوغورو
ایشله ییریک گئجه گوندوز یاتمیریق
باشیمیزی دینج یاسدیغا آتمیریق
یارالدیبدیر تانری بیزی غم چکه ک؟
غم دنیزدیر بیز لیمانا چاتمیریق!
غمیز ندیر؟ سوروشسالار نه دئیک؟
بیلمه مک دیر لاپ دوغروسو قوی دئیک
بیلمه مگین کؤتگینی یئییریک
تاریخ بویو ایش بئله دیر قوی دئیک
بیلیک سیزین سؤزون ائشیت اینانما
بیلیک سیز گل هئچ بیر ایشه بولانما
بیلیگه سیز بیر قویسانیز مینیز وار
بیلیک لی لر ایشی گؤرر اینام لا
تانری بیزه پای وئریبدیر بیر بوللو
یئملی دن ایچملی دن یئر دولو
بیلیک له بیز چتین لری آچاراق
اؤلدوزلارا سالابیللیک بیل یولو
بیلیک سیز ایش دوز یئرینده اوتورماز
اوتورسا دا ایستک لری دوغرولتماز
باشاریق لا بیلیک وئرسه ال اله
ایش گؤرنلر ایشلمک دن یورولماز
بیز بو سؤزو اوشاق لارا دئمه لی
دورو سو تک گئجه گوندوز ایچمه لی
« اکین بیچین صنعت له ایش دیریلیک
یول لارینی بیلیک ایله گئتمه لی»
